أنا فاقد حنان سنين ومـا هـو بيـوم
يا بنت الأجواد خلينـي علـى حالـي

تكفيـن خلِّينـي بـي جـروح ومكلـوم
بأسباب درب الحـب يـا مـا جرالـي

درب الهوى متعب وانا فيـه معلـوم
وكـم صدمـةٍ جتـنـي تـهـد الجبـالـي

حب الصدق والتضحية صار معدوم
وصـار الوفـاء بوقتنـا شـي محالـي

فضَّلت أنا العيشة من الحب محروم
ويرتـاح قلبـي مـن هـمـوم الليـالـي

الحب أشوفه صار يا بنـت مشـؤوم
حبٍّ تجاري ويُشتـرى بـزود مالـي

كانه صفا لك يـوم فأعـوام مصـدوم
مثـل المساهـم لا خسـر لـه ريـالـي

وأنا يا بنت النـاس مانـي بمعصـوم
أخطـي ولكـن ألـوفـا مــن خصـالـي

وخطـاي محـدود بلسانـي ولا يـدوم
أرجـع وأقـدم عـذري لمـن صفالـي

إلاَّ الخيانـة والكـذب شـيء مـذمـوم
نفسي ما تقبلهـا علـى آيـات حالـي

تعبت مـن ذا النفـس وألومهـا لـوم
علـى ألوفـا والصـدق محـدٍ وفـالـي

وحب التملك مـن طباعـي ومختـوم
غيور حتـى مـن الهبـوب الشمالـي

إذا عشقت فعشقي إخلاص محتـوم
وإلاَّ بليَّـا أعشـق ويـا طـيـب فـالـي

قرّرت هجـر العشـق والحـب لليـوم
ومــن رام حـبـي فيتحـمّـل هـبـالـي



إبن محياء